gulaab aur kapaas
kheto.n me.n kaam karatii hu_ii la.Dakiyaa.N

jeTh kii champa_ii dhuup ne

jin kaa sonaa badan

surma_ii kar diyaa

jin ko raato.n me.n os aur paale kaa bistar mile

din ko suuraj saro.n par jaleye hare laun me.n

sang-e-marmar ke bencho.n pe baiThii hu_ii

un ha.Nsii muurato.n se kahii.n Khuubasuurat

kahii.n muKhtalif

jin ke juu.De me.n juuhii kii kaliyaa.N sajii.n

jo gulaab aur bele kii Khushbuu liye

aur rango.n kii hiddat se paagal phire.n

khet me.n dhuup chunatii hu_ii la.Dakiyaa.N bhii

na_ii umr kii sabz dahaliiz par hai.n magar

aaa_iinaa tak nahii.n dekhatii.n

y gulaab aur Dezii kii hiddat se naa_aashnaa

Khushbuo.n ke jaaa.N lams se beKhabar

phuul chunatii hai.n lekin pahanatii nahii.n

in ke malabuus me.n

tez sarso.n ke phuulo.n kii baas

un kii aa.Nkho.n me.n roshan kapaas
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

aa.Nkhe.n mujhe talvo.n se vo malane nahii.n dete

aa.Nkhe.n mujhe talvo.n se vo malane nahii.n dete
armaan mere dil kaa nikalane nahii.n dete

Khaatir se terii yaad ko Talane nahii.n dete
sach hai ki hamii.n dil ko sa.nbhalane nahii.n dete

kis naaz se kahate hai.n vo jhu.njhalaa ke shab-e-vasl
tum to hame.n karavaT bhii badalane nahii.n dete

paravaano.n ne faanuus ko dekhaa to ye bole
kyo.n ham ko jalaate ho ki jalane nahii.n dete

hairaan huu.N kis tarah karuu.N arz-e-tamannaa
dushman ko to pahaluu se vo Talane nahii.n dete

dil vo hai ki fariyaad se lab_rez hai har vaqt
ham vo hai.n ki kuchh muu.Nh se nikalane nahii.n dete

garmii-e-mohabbat me.n vo hai aah se maane’
pankhaa nafas-e-sard kaa jhalane nahii.n dete

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

duniyaa me.n huu.N duniyaa kaa talab_gaar nahii.n huu.N

duniyaa me.n huu.N duniyaa kaa talab_gaar nahii.n huu.N
baazaar se guzaraa huu.N Khariidaar nahii.n huu.N

zindaa huu.N magar ziist kii lazzat nahii.n baaqii
har chand ki huu.N hosh me.n hoshiyaar nahii.n huu.N

is Khaanaa-e-hastii se guzar jaauu.Ngaa belaus
saayaa huu.N faqat naqsh-e-diivaar nahii.n huu.N

afasurdaa huu.N ibarat se davaa kii nahii.n haajat
Gam kaa mujhe ye zauf hai biimaar nahii.n huu.N

vo gul huu.N Khizaa.N ne jise bar_baad kiyaa hai
uljhuu.N kisii daaman se mai.n vo Khaar nahii.n huu.N

yaarab mujhe mahafuus rakh us but ke sitam se
mai.n us kii inaayat kaa talab_gaar nahii.n huu.N

afasurdagii-o-jaur kii kuchh had nahii.n “Akbar”
kaafir ke muqaabil me.n bhii dii.n_daar nahii.N huu.N

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

hangaamaa hai kyuu.N barpaa tho.Dii sii jo pii lii hai

hangaamaa hai kyuu.N barpaa tho.Dii sii jo pii lii hai
Daakaa to nahii.n Daalaa chorii to nahii.n kii hai

naa-tajurbaakaarii se vaa_iz kii ye baate.n hai.n
is rang ko kyaa jaane puuchho to kabhii pii hai

us mai se nahii.n matalab dil jis se hai begaanaa
maqasuud hai us mai se dil hii me.n jo khi.nchatii hai

vaa.N dil me.n ki sadame do yaa.N jii me.n ke sab sah lo
un kaa bhii ajab dil hai meraa bhii ajab jii hai

har zarraa chamakataa hai anavaar-e-ilaahii se
har saa.Ns ye kahatii hai ham hai.n to Khudaa bhii hai

suuraj me.n lage dhabbaa fitarat ke karishme hai.n
but ham ko kahe kaafir allaah kii marzii hai

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

saa.Ns lete huye bhii Darataa huu.N

saa.Ns lete huye bhii Darataa huu.N
ye na samajhe.n ki aah karataa huu.N

bahar-e-hastii me.n huu.N misaal-e-hubaab
miT hii jaataa huu.N jab ubharataa huu.N

[bahar-e-hastii = ocean of life]
[misaal-e-hubaab = like a bubble]

itanii aazaadii bhii Ganimat hai
saa.Ns letaa huu.N baat karataa huu.N

sheKh saahab Khudaa se Darate ho
mai.n to angrezo.n hii se Darataa huu.N

aap kyaa puuchhate hai.n meraa mizaaj
shukr allaah kaa hai marataa huu.N

ye ba.Daa aib mujh me.n hai ‘akbar’
dil me.n jo aaye kah guzarataa huu.N

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

dil meraa jis se bahalataa ko_ii aisaa na milaa

dil meraa jis se bahalataa ko_ii aisaa na milaa
but ke bande to mile allaah kaa bandaa na milaa

bazm-e-yaaraa.N se phirii baad-e-bahaarii maayuus
ek sar bhii use aamaadaa-e-saudaa na milaa

[bazm-e-yaaraa.N = gathering of friends; baad-e-bahaarii = spring wind]
[maayuus = disappointed; aamaadaa-e-saudaa = ready to go mad/be obssessed]

gul ke Khvaahaa.N to nazar aaye bahut itr_farosh
taalib-e-zam_zam-e-bul_bul-e-shaidaa na milaa

[Khvaahaa.N = desirous of; itr_farosh = one who trades in perfume]
[taalib-e-zam_zam-e-bul_bul-e-shaidaa = one who wants the song of
the bird who wants to give all to the flower]

vaah kyaa raah dikhaa_ii hame.n murshad ne
kar diyaa kaabe ko gum aur kalisaa na milaa

[murshad = teacher (guruu); kaliisaa = church]

sayyad uTThe jo gazaT le ke to laakho.n laaye
shaiKh quraan dikhaataa phiraa paisaa na milaa

[gazaT = gazette (newspaper)]

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

dil me.n mahak rahe.n hai.n kisii aarazuu ke phuul -Javed Akhtar

dil me.n mahak rahe.n hai.n kisii aarazuu ke phuul
palakon me.n khilane vaale hai.n shaayad lahuu ke phuul

ab tak hai ko_ii baat mujhe yaad harf harf
ab tak mai.n chun rahaa huu.N kisii guftaguu ke phuul

[harf-harf=each and every letter (of the alphabet)]
[guftaguu=conversation]

kaliyaa.N chaTak rahii thii ki aavaaz thii ko_ii
ab tak sama’ato.n me.n hai ik Khush-guluu ke phuul

[sama'ato.n=hearing; Khush-guluu=one with sweet voice]

mere lahuu kaa rang hai har nok-e-Khaar par
seharaa me.n har taraf hai merii justajuu ke phuul

[nok-e-Khaar=tip of the thorn; seharaa=desert/wilderness]

diivaane kal jo log the phuulo.n ke ishq me.n
ab un ke daamano.n me.n bhare hai.n rafuu ke phuul

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

dukh ke ja.ngal me.n phirate hai.n kab se maare maare log -Javed Akhtar

dukh ke ja.ngal me.n phirate hai.n kab se maare maare log
jo hotaa hai sah lete hai.n kaise hai.n bechaare log

jiivan jiivan ham ne ag me.n khel yahii hote dekhaa
dhiire dhiire jiitii duniyaa dhiire dhiire haare log

sangat dene ko paate hai.n saa.Nso.n ke ik-taare log

is nagarii me.n kyo.n milatii hai roTii sapano.n ke badale
jinkii nagarii hai vo jaane ham Thahare ba.njaare log

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

vo savaa yaad aaye bhulaane ke baad

vo savaa yaad aaye bhulaane ke baad
zi.ndagii ba.Dh ga_ii zahar khaane ke baad

[savaa = more; zahar = poison]

dil sulagataa rahaa aashiyaane ke baad
aag Tha.nDii hu_ii ik zamaane ke baad

raushanii ke liye ghar jalaanaa pa.Daa
kaisii zulmat ba.Dhii tere jaane ke baad

[zulmat = darkness]

jab na kuchh ban pa.Daa arz-e-Gam kaa javaab
vo Khafaa ho gaye muskuraane ke baad

[arz-e-Gam = tale of woe; Khafaa = angry]

dushmano.n se pashemaaa.N honaa pa.Daa hai
dosto.n kaa Khuluus aazamaane ke baad

[pashemaa.N = shame; Khuluus = truth/strength of the relationship]

baKhsh de yaa rab ahal-e-havas ko bahisht
mujhako kyaa chaahiye tum ko paane ke baad

[baKhsh denaa = to grant; rab = God]
[ahal-e-havas = greedy people; bahisht = heaven]

kaise kaise gile yaad aaye “Khumar”
un ke aane se qabl un ke jaane ke baad

[qabl = prior to]
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

ham ke Thahare ajanabii itane madaaraato.n ke baad

ham ke Thahare ajanabii itane madaaraato.n ke baad
phir bane.nge aashnaa kitanii mulaaqaato.n ke baad

[madaaraato.n = hospitality; aashnaa = friend/someone close]

kab nazar me.n aayegii bedaaG sabze kii bahaar
Khuun ke dhabbe dhule.nge kitanii barasaato.n ke baad

[bedaaG = unblemished; sabzaa = greenery]

dil to chaahaa par shikast-e-dil ne mohalat hii na dii
kuchh gile-shikave bhii kar lete munaajaato.n ke baad

[mohalat = respite/time; munaajaato.n = prayers]

the bahut bedard lamhe.n Khatm-e-dard-e-ishq ke
thii.n bahut bemehar subahe.n meharabaa.N raato.n ke baad

[bemehar = unforgiving]

un se jo kahane gaye the “Faiz” jaa.N sadaqaa kiye
anakahii hii rah ga_ii vo bat sab baato.n ke baad

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

kaam aa sakii.n na apanii vafaaye.n to kyaa kare.n

kaam aa sakii.n na apanii vafaaye.n to kyaa kare.n
ik bevafaa ko bhuul na jaaye.n to kyaa kare.n

mujhako ye etaraaf duaao.n me.n hai asar
jaaye na arsh par jo duaaye.n to kyaa kare.n

[etaraaf = concurrence/agree; arsh = seventh heaven (closest to God)

ik din kii baat ho to use bhuul jaaye.n ham
naazil ho.n roz dil pe balaaye.n to kyaa kare.n

[naazil = to fall upon; balaaye.n = troubles]

shab bhar to un kii yaad me.n taare ginaa kiye
taare-se din ko bhii nazar aaye.n to kyaa kare.n

[shab bhar = the whole night; taare-se = like stars]

ahad-e-tarab kii yaad me.n royaa kiye bahut
ab muskuraa ke bhuul na jaaye.n to kyaa kare.n

[ahad-e-tarab = promise of good times]

ab jii me.n hai ki un ko bhulaa kar hii dekh le.n
vo baar baar yaad jo aaye.n to kyaa kare.n

tark-e-vafaa bhii jurm-e-muhabbat sahii “Akhtar”
milane lage.n vafaa kii sazaaye.n to kyaa kare.n

[tark-e-vafaa = end of faithfulness (love)]

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

har Khushii me.n koii kamii sii hai -Javed Akhtarhar Khushii me.n koii kamii sii hai
ha.Nsatii aa.Nkho.n me.n bhii namii sii hai
din bhii chup chaap sar jhukaaye thaa
raat kii nafz bhii thamii sii hai
kisako samajhaaye.N kisakii baat nahii.n
zahan aur dil me.n phir Thanii sii hai
Khvaab thaa yaa Gubaar thaa koii
gard in palako.n pe jamii sii hai
kah gae ham kisase dil kii baat
shahar me.n ek sanasanii sii hai
hasarate.n raakh ho gaii.n lekin
aag ab bhii kahii.n dabii sii hai

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

main aur merii aavaragii -Javed Akhtar

phirate hai.n kab se dar_ba_dar ab is nagar ab us nagar
ek duusare ke ham_safar mai.n aur merii aavaaragii
naa aashanaa har rah_guzar naa mehar_baa.N hai ek nazar
jaaye.n to ab jaaye.n kidhar mai.n aur merii aavaaragii

ham bhii kabhii aabaad the aise kahaa.N bar_baad the
bifikr the aazaad the masaruur the dil_shaad the
vo chaal aisi chal gayaa ham bujh gaye dil jal gayaa
nikale jalaa ke apanaa ghar mai.n aur merii aavaaragii

vo maah-e-vash vo maah-e-ruuh vo maah-e-kaamil huu_ba_huu
thii.n jis kii baate.n kuu_ba_kuu us se ajab thii guftaguu
phir yuu.N huaa vo kho ga_ii aur mujh ko zid sii ho ga_ii
laaye.nge us ko Dhuu.ND kar mai.n aur merii aavaaragii

ye dil hii thaa jo sah gayaa vo baat aisii kah gayaa
kahane ko phir kyaa rah gayaa ashko.n kaa dariyaa bah gayaa
jab kah kar vo dil_bar gayaa tee liye mai.n mar gayaa
rote hai.n us ko raat bhar mai.n aur merii aavaaragii

ab Gam uThaaye.n kis liye ye dil jalaaye.n kis liye
aa.Nsuu bahaaye.n kis liye yuu.N jaa.N gavaaye.n kis liye
peshaa na ho jis kaa sitam Dhuu.Nde.nge ab aisaa sanam
ho.nge kahii.n to kaar_gar mai.n aur merii aavaaragii

aasaar hai.n sab khoT ke imkaan hai.n sab choT ke
ghar band hai.n sab koT ke ab Khatm hai sab ToTake.
qismat kaa sab ye khel hai andher hii andher hai
aise hue hai.n be_asar mai.n aur merii aavaaragii

jab ham_dam-o-ham_raaz thaa tab aur hii andaaz thaa
ab soz hai tab saaz thaa ab sharm hai tab naaz thaa
ab mujh se ho to ho bhii kyaa hai saath vo to vo bhii kyaa
ek behunar ek besabar mai.n aur merii aavaaragii

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

mai.n ne dil se kahaa -Javed Akhtar

mai.n ne dil se kahaa
ai diivaane bataa
jab se ko_ii milaa
tuu hai khoyaa huaa
ye kahaanii hai kyaa
hai ye kyaa silasilaa
ai diivaane bataa
mai.n ne dil se kahaa
ai diivaane bataa
dha.Dakano.n me.n chhupii
kaisii aavaaz hai
kaisaa ye giit hai
kaisaa ye saaz hai
kaisii ye baat hai
kaisaa ye raaz hai
ai diivaane bataa
mere dil ne kahaa
jab se ko_ii milaa
chaa.Nd taare fizaa
phuul bhau.nre havaa
ye hasii.n vaadiyaa.N
niilaa ye aasamaa.N
sab hai jaise nayaa
mere dil ne kahaa

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

dard apanaataa hai paraa_e kaun -Javed Akhtar

dard apanaataa hai paraa_e kaun
kaun sunataa hai aur sunaa_e kaun

kaun doharaa_e vo puraanii baat
Gam abhii soyaa hai jagaa_e kaun

vo jo apane hai.n kyaa vo apane hai.n
kaun dukh jhele aazamaa_e kaun

ab sukuu.N hai to bhuulane me.n hai
lekin us shaKhs ko bhulaa_e kaun

aaj phir dil hai kuchh udaas udaas
dekhiye aaj yaad aa_e kaun

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

dard ke phuul bhii khilate hai.n bikhar jaate hai.n -Javed Akhtar

dard ke phuul bhii khilate hai.n bikhar jaate hai.n
zaKhm kaise bhii ho.n kuchh roz me.n bhar jaate hai.n

us dariiche me.n bhii ab ko_ii nahii.n aur ham bhii
sar jhukaa_e hu_e chup-chaap guzar jaate hai.n

raastaa roke kha.Dii hai yahii ulajhan kab se
ko_ii puuchhe to kahe.n kyaa ki kidhar jaate hai.n

narm aavaaz bhalii baate.n mohazzab lahaje
pahalii baarish me.n hii ye rang utar jaate hai.n